Oleg Sentsov, ukrain yönetmeni, yazıcı, Kremlniñ siyasiy mahbüsi
Bizim keri qaytacağımız tek zaman meselesi degil, vaziyetimizniñ de meselesidir. Bu, Ukraina territorial bütünliginiñ ve adalet ğayrıdan tiklenilmesiniñ meselesidir. Putin de Qırımnı işğal etkende keçken zamannıñ tarihiy vaqialarına ve devletlerge esaslanaraq, bugünki añlaşma ve tanılğan sıñırlarnı körmemezlikke alıp, doğru iş yapqanına inana edi. Evelleri dostum ve qardaşım dedigi qomşusından özüne ait olmağan şeyni hırsızlap, tutıp aldı. Ne yapacañ, yamâmlarnıñ da özüne köre mantığı bar, olar da doğru iş tutqanlarına inanalar.
Ükümet ve rejim deñişkeni sebebinden, ülkede yüz bergen inqilâptan soñ tarihiy dönüş noqtasına kelgen Ukraina işğalge silâlı mudavimet köstermege azır degil edi. Em de yalıñız arbiy ceetten degil de, psihologik ceetten ce azır olmağanı malüm oldı. Daa dün yaqını, dep bellegen insanlarğa ateş açmaq zor edi. Ukraina ruslarğa ateş açmağa ne qadar azır olmasa, dünyanıñ bütün diger qısmı da olarğa qarşı ateş açmağa azır degil edi. Qırım elden qaçırıldı, Ukraina tecavuzkârnıñ arbiy qudreti ile bastırıldı.
Dünya ise raatsız olğanını bildirerek, yasaqlar aqqında aytıp başladı ve bunı artıq tarihnıñ soñu, dep belledi. Ancaq bu, yalıñız başlanğıç edi, çünki kimdir dünyanıñ qaideleri ve printsiplerini zorluqnen deñiştirmnege tırışqanda başqa türlü olabilmez. Soñra Donbasstaki adiseler, Malayziya Boingi, biñlernen elâk olğanlar ve artıq Ukrainanıñ yarısını tutıp almaq areketleri oldı.
Zalımğa parmağıñnı tişletseñ, olar qoluñnı aşamağa ister, em de taki bütüneleyin yutmağance toqtamaz. Ayvan tek küç tilini añlay.
Biz mudavimet köstermege başlağanımız içün ayaqta qaldıq. Biz tek ateş açmağa başlağanımız içün yutquzmadıq. Ğarp, tabiiy ki, biznen beraber ateş açmadı — iç kimse başqasınıñ muarebesinde, hususan, adro raketalarına işanğan duşmannen olğan cenkte ölmege istemedi. Telükesizlik siğortası qarşılığında biz yadro silâmıznı olacaq duşmanımızğa berdik. Siğorta adisesi yüz bergende ise iç kimse esabını ödemege istemedi. Bu esapnı eline silâ alıp ve öz vatanını duşmannıñ pancasına taşlamağa istemegen ukrain askerleri ve göñülliler ödedi
Cenkniñ başında olğanı kibi şimdi artıq qan tökülmey, ruslar tarafından «Grad"lar urmay, yalıñız bir yerlerde, öyle de ilân etilmegen şu cenkte oğlunıñ elâk olğanı aqqında haber alğan ananıñ feryadı eşitile. Qırımnıñ işğali ile başlanğan cenk.
Cenk ne zaman bitecegini bilmeymiz, amma o qayerde bitecegi ve kim onda ğalip olacağını tam bilemiz. Rusiye ile muarebe Ukrainanıñ Qırımında, menim vatanımda, biz mıtlaqa qaytacağımız topraqta bitecek. Ve biz ğalip olaraq qaytırmız.